നെയ്മറിന്റെ പ്രിയ എതിരാളി – വിയ്യാറയൽ !

നെയ്മറിനു ഗോൾ വല കുലുക്കുന്നത് എത്ര പ്രിയപ്പെട്ടതാണെന്ന് നമുക്ക് എല്ലാവർക്കും അറിയാം‌. ഇനി ബാഴ്സലോണ നേരിടാനൊരുങ്ങുന്ന വിയ്യാറയലിനു അത് മറ്റാരേക്കാളും നന്നായി അറിയാം.

നൂകാമ്പിൽ മൂന്ന് ലാ ലിഗ മൽസരങ്ങൾ നെയ്മർ മഞ്ഞപ്പടയെ നേരിട്ടിട്ടുണ്ട്. അതിൽ 5 ഗോളുകൾ ആണ് അദ്ദേഹം നേടിയത് ! അതോടെ പി. എസ്‌. ജി., അത്ലറ്റിക് ബിൽബാവൊ, റയൊ വയ്യെക്കാനൊ എന്നിവരുടെ കൂടെ നെയ്മറിന്റെ ഏറ്റവും പ്രിയ ഇരകളായി വിയ്യാറയൽ.

2013 ൽ ലയണൽ മെസ്സി സസ്പെൻഷൻ മൂലം വെളിയിലിരുന്ന ലാ ലിഗ മൽസരത്തിൽ ആണ് വിയ്യാറയലിനെ നെയ്മർ നേരിട്ടത്. അന്ന് ഇരുഗോളുകൾ നേടി മെസ്സിയുടെ അഭാവം അറിയിക്കാതെ വിജയതീരത്ത് നെയ്മർ എത്തിച്ചു. 2014-15 സീസണിൽ ഇരുവട്ടം പിറകിൽ നിന്ന ശേഷം ബാഴ്സ വിജയിച്ച മൽസരത്തിലും നെയ്മർ ഗോളോടെ തിളങ്ങി. കഴിഞ്ഞ സീസണിൽ മെസ്സി പരിക്കേറ്റ് പുറത്തായ അവസരത്തിൽ രണ്ട് ഗോളുകൾ നേടി രക്ഷകനായി നെയ്മർ. കോപ ഡെൽ റേ മൽസരങ്ങൾ കൂടെ കണക്കിലെടുത്താൽ 8 ഗോളുകൾ നെയ്മർ വിയ്യാറയലിനെതിരെ നേടി; മറ്റേത് ടീമിനേക്കാളും കൂടുതൽ. അതിനാൽ ഇന്നത്തെ മൽസരത്തിൽ നെയ്മറിന്റെ മറ്റൊരു തിളക്കമാർന്ന പ്രകടനത്തിനായാണ് ആരാധകർ കാത്തിരിക്കുന്നത്.